الشاعرة .. احاسيس
يا مهيّض في حروفك كل عرقٍ مستقر
كيف ابلجم خافقٍ جامح من الاشواق ثار
من روابيع الغرام اللي تقفاه الدهر
ما بقالي في غصون الوصل زهر ولا ثمار
ياهواي ويا مناي ويا تقاسيم العمر
ما فرد بالقلب جنحانه سواك من الحرار
كيف تقوى البعد وانته من بعيدين النظر
كيف وانت العاشق الولهان تخلف للمسار
الهجر دايم يورّد صاحبه وادي سقر
كل ما يطري عليه صويحبه يشتب نار
انكسار الذات صعب انّك تحصل له جبر
الزجاجه مالها تجبير بعد الانكسار
انت شمسٍ عن مدارك كيف ابلقالي مفر
وانت كوكب بدري اللي مالقى غيرك مدار
ذكرياتك كل يوم اعيشها بعد الهجر
كيف ابنسى دام مالي عنك بالدنيا قرار
آتوجّد مير ما للروح حيله بالقدر
الليالي قيد والايام من بعدك هجار. احاسيس الشمري
